ماهو علاج النسيان و عدم القدرة على التركيز؟

السلام عليكم و رحمة الله و بركاته..

عمري ٢٣..

لي تقريبًا سنه ( أو ربما أقل ) لاحظت إني أنسى بشكل فضيع، أحس ذاكرتي صارت مؤقته..
يعني أتذكر الشيء وقت اللحظة.. لو تمر كم ساعة أحاول أتذكر إيش قلت أو إيش عملت الاقي صعوبة في إني أتذكر..
مثلا.. لو فرضًا سويت شيء يوم الأحد.. يجي أحد يسألني يوم الثلاثاء متى عملته؟ الأحد أو الأثنين؟ أخذ وقت عشان أفكر متى بالضبط عملته..
أو حتى لو نفس اليوم في الليل.. أخذ وقت أفكر.. هل عملت الشيء اليوم الصباح أو أمس؟!

هذا الشيء سبب لي قلق في حياتي .. لأن أحس أمور كثيرة تعطلت بسبب إني مو قادرة أفتكر أو حتى أفكر.. أحس مخي فاضي!

ما كان عندي قلق من قبل.. الحين صرت قلقانه و ما صرت أحب أتكلم مع أحد عشان ما أحرج نفسي..

أنا كنت وحدة متفوقة جدًا في الدراسة.. و ذاكرتي قوية.. الآن صار العكس تمامًا..

أكثر شيء أثر فيني.. مرا كنت أوصف لشخص البيت عن طريق التليفون ولما طلب رقم الشقة.. نسيت! أعطيته رقم غلط! و أنا لي حول ٥ سنوات عايشة فيها..

كمان شيء ثاني.. ما أقدر أركز مع الشخص اللي يكلمني..
أشوف شفايف تتحرك.. بس مو قادرة أستوعب الكلام! أستوعب شيء و شيء ما أقدر.. يجيني شرود ذهني.. على إني أحاول أركز و صرت أردد إني أركز و إني أفتكر كل شيء بس ما فادني هالشيء أبدًا ..

صرت لما أتكلم يا أتأتئ في الكلام و تعلق الكلمة لين ما تطلع.. يا أخذ وقت أحاول الاقي كلمة مناسبة.. و كأن مخي فاضي..

أو مرات الكلام يطلع غلط.. أو أقول كلمة ما لها علاقة بالموضوع..

برضوا الاقي صعوبة لما أجي أكتب أي كلمة.. أنسى كيف تنكتب..

غير الذاكرة.. و التركيز..

كنت أشتكي من صداع حاد.. الحين الحمدلله خف أحسن من أول.. كان يجيني بالجهة اليسار.. و أحيانا يجيني تنميل بكفي اليمين..

لكن في شيء مستمر اللي هو أشوف زي فلاشات على الجنب.. لو أحرك عيني بطالع يمين أو يسار أحس بألم..

هل أحتاج أروح لطبيب عشان أعمل تحاليل لـ فيتامين د ، حديد و الغدة الدرقية؟ ولا إيش بالضبط؟

على إني أخذ قطرات فيتامين د و أحاول أكل أكلات فيها حديد مع فيتامين سي…

جزاكم الله خيرًا..